༧གོང་ས་མཆོག་ཨ་རིའི་Atlanta གྲོང་ཁྱེར་ནང་ཡོད་པའི་Emory གཙུག་ལག་ སློབ་གྲྭ་ཆེན་མོའི་ནང་ཞབས་སོར་འཁོད་དེ་མཛད་འཕྲིན་ཁག་ཅིག་བསྐྱངས་རྒྱུ་ཡིན་འདུག  དེ་ཡང་ཕྱི་ཟླ་ ༡༠ ཚེས་ ༨ ནས་ཚེས་ ༡༠ བར་ཉིན་གྲངས་གསུམ་རིང་༧གོང་ས་སྐྱབས་མགོན་ཆེན་པོ་མཆོག་Emoryགཙུག་ལག་སློབ་གྲྭ་ཆེན་མོའི་ནང་བཞུགས་བཞག་མཛད་པའི་རིང་བཀའ་སློབ་དང་། བགྲོ་གླེང་སོགས་ཀྱི་མཛད་འཆར་དུ་མ་ཞིག་བསྐྱངས་རྒྱུའི་ཁོངས་ཕྱི་ཚེས་ ༨ ཉིན་དུས་རབས་ཉེར་གཅིག་པའི་ནང་ཆབས་འབངས་ཀྱི་འགན་འཁུར་ཞེས་པའི་བརྗོད་གཞིའི་ཐོག་བཀའ་སློབ་གནང་རྒྱུ་ཡིན་འདུག Emory གཙུག་ལག་སློབ་གྲྭ་ཆེན་མོའི་སློབ་དཔོན་དགེ་ཤེས་བློ་བཟང་ལགས་ཀྱིས་གསུང་པར་གཞིགས་ན།  ཐེངས་འདིའི་ཆིབས་བསྒྱུར་སྐབས་༧གོང་ས་སྐྱབས་མགོན་ཆེན་པོ་མཆོག་གིས་གཙོ་བོ་ཤེས་ཡོན་དང་། ཆོས་ལུགས་དང་མ་འབྲེལ་བའི་ཡ་རབས་བཟང་སྤྱོད་སྐོར་ལ་བཀའ་སློབ་དང་། བགྲོ་གླེང་སོགས་གནང་རྒྱུའི་མཛད་འཆར་ཡོད་འདུག  སྐབས་དེའི་མཛད་རིམ་ཁག་དྲ་ལམ་ནས་ཐད་ཀར་གཏོང་འཆར་ཡོད་འདུག