ཟླ་༡༠ ཚེས་ ༡ ཉིན་བཙན་བྱོལ་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་རྒྱ་རི་སྒྲོལ་མ་མཆོག་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་Shri Virbhadra Singh མཆོག་དང་མཇལ་འཕྲད་གནང་ནས། རྡ་ས་མེག་གྷན་ཁུལ་བོད་ཀྱི་ཟློས་གར་ཚོགས་པ་དང་། བྷག་སུ་ལམ་ཟུར་དུ་ཡོད་པའི་བོད་མིའི་སྡོད་ཁང་ཁག་ ༢༡༠ ཙམ་ཡོད་པ་དེ་དག་བོད་མིའི་བདེ་སྡུག་གནས་སྟངས་ལ་གཞིགས་གཏོར་བཤིག་མི་དགོས་པའི་འབོད་སྐུལ་ཞུས་ཡོད་འདུག  ཕྱོགས་མཚུངས་ནང་སྲིད་བཀའ་བློན་མཆོག་གིས་སྐབས་དེར་རྒྱ་གར་ཤིང་ནག་ལས་ཁུངས་ཀྱིས་བོད་མི་ཚོར་སྡོད་ཁང་ནས་ཕྱིར་འབུད་གཏོང་རྒྱུའི་བརྡ་ཁྱབ་བཏང་བའི་སྐོར་སྙན་སྒྲོན་ཞུས་པ་དང་སྦྲགས། བརྡ་ཁྱབ་དེས་མེག་གྷན་གཡས་གཡོན་གྱི་བོད་མི་སྡོད་ཁང་རྩ་མེད་བཟོ་རྒྱུ་མ་ཟད། ལམ་ཟུར་དུ་ཁྲོམས་ས་བཙུགས་ནས་སྡོད་མཁན་བོད་མི་དེ་དག་གི་འཚོ་བའི་མདུན་ལམ་ལ་ཧ་ཅང་དཀའ་ངལ་འཕྲད་རྒྱུ་ཡིན་པ་དང་། འབྲེལ་ཡོད་ས་ཁུལ་དེ་དག་གི་བོད་མི་ཚོས་བོད་མི་སྤྱི་མཚུངས་ལྟར་བོད་ཀྱི་གནད་དོན་སེལ་ཉིན་བོད་དུ་ཕྱིར་ལོག་བྱ་རྒྱུ་ཁོ་ན་མ་གཏོགས་བོད་མི་དེ་དག་གིས་སྤྱི་ས་སྒེར་བཟུང་བྱ་རྒྱུའི་བྱུས་ངན་གྱི་ཀུན་སློང་རྩ་བ་ནས་འཆང་བཞིན་མེད་པར་བརྟེན་སྤྱི་ཁྱབ་བློན་ཆེན་མཆོག་ནས་གང་ཐུབ་རོགས་རམ་ཡོང་བའི་འབོད་སྐུལ་ཤུགས་ཆེ་ཞུས་ཡོད། བོད་མི་དེ་དག་གི་འཚོ་བའི་མདུན་ལམ་ལ་ཧ་ཅང་དཀའ་ངལ་འཕྲད་རྒྱུ་ཡིན་པ་སོགས་བདེ་སྡུག་གནས་སྟངས་ཡར་ཞུས་པ་དང་། གང་ཐུབ་རོགས་རམ་ཡོང་བའི་འབོད་སྐུལ་ཤུགས་ཆེ་ཞུས་ཡོད་འདུག

སྤྱི་ཁྱབ་བློན་ཆེན་མཆོག་ནས་ཀྱང་རྫོང་དཔོན་མཆོག་ Deputy Commissioner དང་འབྲེལ་བ་གནང་སྟེ་ས་གནས་བོད་མིའི་གནས་སྟངས་སྐོར་ལས་བསྡོམས་ལ་གཟིགས་ཞིབ་གནང་སྟེ་བོད་མིའི་སྡོད་ཁང་དང་ལམ་ཟུར་ཁྲོམ་ས་སོགས་ཀྱི་དཀའ་ངལ་དེ་དག་སེལ་ཆེད་ཐབས་ཤས་གང་ཡོད་གནང་རྒྱུ་ཡིན་པའི་ཁས་ལེན་ཡང་གནང་ཡོད་འདུག