༸གོང་ས་མཆོག་གིས་མ་སུ་རི་བོད་ཕྲུག་ཁྱིམ་སྡེ་དབུ་བརྙེས་ནས་ལོ་ལྔ་བཅུ་འཁོར་བའི་མཛད་སྒོར་དབུ་བཞུགས་ཐོག་བཀའ་སློབ་སྩལ་བ།
༢༠༡༢ ཟླ་ ༩ ཚེས་ ༡༧ རེས་གཟའ་ཟླ་བ།
༄༅། །འདི་གའི་ཕྱི་དྲིལ་བོད་ཡིག་ཚན་པའི་སྤྱི་ཁྱབ་རྩོམ་སྒྲིག་པ་སྐལ་བཟང་མཁས་གྲུབ་ལགས་ཀྱིས་མ་སུ་རི་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༩ ཚེས་ ༡༧ ཉིན་གྱི་སྔ་དྲོ་ཆུ་ཚོད་ ༨།༤༥ ཐོག་༸གོང་ས་༸སྐྱབས་མགོན་ཆེན་པོ་མཆོག་མ་སུ་རི་བོད་ཕྲུག་ཁྱིམ་སྡེ་དབུ་བརྙེས་ཏེ་མི་ལོ་ལྔ་བཅུ་ཧྲིལ་པོ་འཁོར་བའི་མཛད་སྒོ་གཏན་སློབ་འདོད་རྒུ་ཐང་དུ་གོ་སྒྲིག་ཞུས་ཡོད་པར་གདན་ཞུས་ཀྱིས་༸ཞབས་སོར་འཁོད་བདེ་བར་འཁོད་བསྟུན། བོད་ཁྱིམ་དྲུང་ཆེའི་ལས་རོགས་ནས་ཕེབས་བསུའི་འཚམས་འདྲི་ཞུས་རྗེས་རྟེན་འབྲེལ་གསོལ་ཇ་དང་གྲོ་མ་འབྲལ་སིལ་འདེགས་འབུལ་ཞུས།
དེ་ནས་བོད་ཁྱིམ་སློབ་གྲྭའི་རོལ་ཆ་རུ་ཁག་གི་སྣེ་འཁྲིད་དེ་ཁང་ཚན་ཁག་དང་། མ་སུ་རི་གཏན་སློབ། རྭ་ཇ་པུར་སློབ་གྲྭ་བཅས་ནས་རིམ་པ་བཞིན་རུ་སྒྲིག་བཏང་སྟེ་༸གོང་ས་༸སྐྱབས་མགོན་ཆེན་པོ་མཆོག་ལ་ཆེ་མཐོའི་གུས་འདུད་ཞུས། དེ་ནས་འཕགས་བོད་གཉིད་ཀྱི་རྒྱལ་གླུ་རིམ་བཞིན་ཕུལ་རྗེས་བོད་ཁྱིམ་རོལ་ཆའི་རུ་ཁག་ནས་རྔ་རོལ་གྱི་མཆོད་སྤྲིན་གཟིགས་འབུལ་ཞུས། དེ་ནས་མ་སུ་བོད་ཕྲུག་ཁྱིམ་སྡེའི་དྲུང་ཆེས་ལས་སྡོམ་སྙིང་བསྡུས་སྙན་སྒྲོན་ཞུས་པའི་ནང་། བོད་མི་རྣམས་བཙན་བྱོལ་དུ་འབྱོར་རྗེས་༸གོང་ས་མཆོག་གིས་མ་འོངས་སྔོན་གཟིགས་ཀྱི་བཀའ་དགོངས་བཞིན་ཕྲེང་རིང་ལྷ་སྐུ་ཨ་མ་རིན་ཆེན་སྒྲོལ་མ་ལགས་ཀྱིས་ཕྱི་ལོ་ ༡༩༦༢ ལོའི་ཟླ་ ༡༡ ཚེས་ ༡༥ ཉིན་ཐོག་མར་ཁྱིམ་ཚང་གསུམ་ནང་དྭ་ཕྲུག་ཉམ་ཐག་གྲངས་ ༧༥ ཡོད་པ་འགོ་འཛུགས་ཆེད་སྨན་འགྲོ་གྲོན་ཡོངས་རྫོགས་དཔལ་ལྡན་སྐུ་སྒེར་ཡིག་ཚང་ནས་གསོལ་སྩལ་ཐོག་བོད་ཕྲུག་ཁྱིམ་སྡེ་འདི་དབུ་འཛུགས་གནང་ཡོད། ཕྱི་ལོ་ ༡༩༦༣ ཟླ་ ༤ ཚེས་ ༢༣ ཉིན་ཁྱིམ་ཚང་བརྒྱད་ཡོད་པ་གཞུང་འབྲེལ་ཐོག་ངོས་ལེན་ཐོབ་སྟེ་༸གོང་ས་༸སྐྱབས་མགོན་ཆེན་པོ་མཆོག་གིས་དབུ་འབྱེད་བཀའ་དྲིན་ཆེ་བ་བསྐྱངས་ཡོད། དེ་ནས་ད་བར་
མི་ལོ་ལྔ་བཅུའི་རིང་ཕྱི་ནང་གི་ཡར་རྒྱས་ཕྱིན་ཡོད་ལ་སློབ་ཕྲུག་བརྒྱ་ཕྲག་མང་པོར་སློབ་གསོའི་མཐུན་རྐྱེན་སྦྱར་ཏེ་འདབ་ཤོག་གཉིས་ལྡན་གྱི་རང་རེའི་སྤྱི་ཚོགས་ནང་ཞབས་འདེགས་ཞུ་མཁན་བྱུང་ཡོད། ཅེས་སོགས་ཀྱི་ལས་སྡོམ་སྙིང་བསྡུས་སྙན་སྒྲོན་ཞུས།
དེ་ནས་བོད་ཁྱིམ་སློབ་ཕྲུག་དང་གཏན་སློབ་སློབ་ཕྲུག་བཅས་ནས་གཞན་སྣ་ཁག་གཅིག་གཟིགས་འབུལ་ཞུས་གྲུབ་མཚམས་༸གོང་ས་༸སྐྱབས་མགོན་ཆེན་པོ་མཆོག་གིས་ལོ་ལྔ་བཅུ་འཁོར་བའི་རྗེས་དྲན་དུས་དེབ། ཅེས་པའི་མི་ལོ་ལྔ་བཅུའི་རིང་གི་ལོ་རྒྱུས་སྙིང་བསྡུས་བརྙན་དེབ་དབུ་འབྱེད་བཀའ་དྲིན་ཆེ་བ་བསྐྱངས་རྗེས་རྒྱལ་སྤྱིའི་ཨེ་སི་ཨོའི་ཨེསེ་མཚན་གནས་ཚོགས་གཙོ་སྐུ་ཞབས་ཀུ་ཀྲིན་མཆོག་ལ་བོད་ཁྱིམ་ནས་ཐུགས་རྗེ་ཆེ་ཞུའི་ཕྱག་རྟགས་༸གོང་ས་༸སྐྱབས་མགོན་ཆེན་པོ་མཆོག་གིས་སྩལ་སྐྱོང་ཡོང་བའི་སྐྱབས་འཇུག་ཞུས་དོན་ལྟར་སྩལ།རྒྱལ་སྤྱིའི་ཨེ་སི་ཨོའི་ཨེསེ་མཚན་གནས་ཚོགས་གཙོ་སྐུ་ཞབས་ཀུ་ཀྲིན་མཆོག་གིས་གསུང་བཤད་མདོར་བསྡུས་གནང་བའི་ནང་། བོད་མིའི་སྤྱི་ཚོགས་ཁྲོད་ཀྱི་གཞོན་སྐྱེས་ཚོར་ཚོགས་པ་འདིས་ཤེས་ཡོན་སློབ་གསོའི་ཐད་ལྟ་སྐྱོང་བྱས་པར་བརྟེན། བོད་ཕྲུག་རྣམས་ཧ་ཅང་ཡག་པོ་བཟོ་ཐུབ་པ་བྱུང་ཡོད། བོད་ཕྲུག་ཁྱེད་རྣམས་ནས་ཀྱང་བོད་མིའི་འདུ་ཤེས་བཟུང་ཐུབ་པ་ཞིག་དང་། རེ་བ་རྩ་བ་ནས་བརླག་རྒྱུ་མེད་ཅེས་སོགས་ཀྱི་གསུང་བཤད་གནང་ཡོད། དེ་རྗེས་ས་གནས་རྒྱ་གར་དཔོན་རིགས་ཁག་གཉིས་ནས་ཀྱང་གསུང་བཤད་མདོར་བསྡུས་གནང་།
དེ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ཕེབས་པའི་ནང་། ང་ཚོ་མ་སུ་རིར་ཐོག་མ་འབྱོར་རྗེས་སྐབས་དེའི་ཛ་དྲག་གི་ལས་ཀ་དེ་ང་ཚོ་མ་སུ་རིར་འབྱོར་མ་འབྱོར་ནས་བོད་མི་ཁྲི་ཕྲག་ཁ་ཤས་ཤིག་དམར་འགོ་ལ་བརྒྱུད་དེ་མོན་ལ་ཡོང་རྒྱུའི་ཧ་ཅང་ཛ་དྲག་ཅིག་ཆགས་པ་རེད། དེའི་ནང་ནད་པ་དང་རྨས་མ་དེ་འདྲ་ཡང་ཡོད། སྐབས་དེར་རྒྱལ་སྤྱིའི་ཚོགས་པ་དེ་འདྲས་རོགས་རམ་ཡག་པོ་བྱས་ཡོད། ཨ་རིའི་ཛ་དྲག་ཚོགས་པ་ཞིག་བཙུགས་ཏེ་དེའི་ཐོག་ནས་རོགས་རམ་བྱས་ཡོད་ལ་གཙོ་ཆེ་ཤོས་རྒྱ་གར་གཞུང་ནས་རོགས་རམ་ཧ་ཅང་མང་པོ་བྱས་ཡོད། འོན་ཀྱང་མེ་ས་མ་རིའི་ས་ཆ་དེ་ཟླ་བ་བཞི་པ་ལྔ་པ་ཟེར་དུས་ཚ་བ་ལང་བའི་དུས་དེ་ཁེལ་ཡོད་པར་སོང། བོད་པ་ཚོ་ཧོབ་སྟེ་ས་གནས་དེར་འབྱོར་སྟབས་དཀའ་ངལ་ཧ་ཅང་མང་པོ་འཕྲད་ཡོད། སྔོན་ལ་ཛ་དྲག་གི་གནས་ཚུལ་ཐོག་ནས་དེ་དག་ས་བསིལ་སར་འགྲོ་རྒྱུ་ཞིག་བྱུང་ན་ཞེས་དང་།
དེར་ཕྱིན་རྗེས་ཟས་གོས་ནར་གཏོང་བྱེད་མཁན་ནི་ཁག་པོ་ཡིན་པར་བརྟེན། ལས་ཀ་ཞིག་འཚོལ་དགོས་ཀྱང་ལས་ཀ་གཞན་རག་རྒྱུ་མེད་སྟབས་མང་ཆེ་བ་ལམ་བཟོ་བྱེད་པར་སོང་བ་རེད། ཅེས་སྔོན་ལ་ཛ་དྲག་གི་ལས་ཀ་དེ་དག་མཇུག་བསྒྲིལ་རྗེས་ཕྲན་བུ་ལྷིང་འཇགས་ཡོང་སྐབས། ང་ཚོས་སློབ་གྲྭ་གལ་ཆེན་པོ་རེད་སློབ་གྲྭ་བཙུགས་དགོས་ཀྱི་འདུག་ཅེས་དང་། ཐོག་མར་སློབ་ཕྲུག་ལྔ་བཅུ་བྱས་ཏེ་སློབ་གྲྭའི་རྟེན་གཞི་དེ་མ་སུ་རིར་བཙུགས་པ་འདི་སློབ་གྲྭ་རྙིང་ཤོས་ཆགས་ཡོད། དེ་ནས་པོ་ལན་ཡུལ་ནས་ཡིན་པ་ངོ་ཤེས་པོ་ལན་སྤོ་ལགས་ཞུ་བ་དེས་བོད་ཁྱིམ་བཙུགས་དགོས་པའི་དགོངས་འཆར་གནང་བ་བཞིན། ང་ཚོས་མ་སུ་རིར་ཁྱིམ་ཚང་བཙུགས་པ་རེད། ཅེས་སོགས་ཀྱི་བཀའ་སློབ་ལམ་སྟོན་ཧ་ཅང་ཟབ་རྒྱས་སྩལ་རྗེས་བོད་ཁྱིམ་དྲུང་ཆེའི་ལས་རོགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་སྔ་དྲོའི་མཛད་རིམ་ཁག་ཡོངས་སུ་ལེགས་གྲུབ་ཟིན།
ཕྱེད་ཡོལ་ཚུ་ཚོད་ ༡།༣༠ ཐོག་བོད་ཁྱིམ་སྦྱིན་བདག་ཕྱི་རྒྱལ་མི་སྣ་ཁག་གཅིག་ལ་མཇལ་ཁ་དང་གསུང་མོལ་སྩལ་རྗེས་བོད་ཁྱིམ་གྱི་འདྲ་པར་རྙིང་རིགས་ཁག་གི་འགྲེམས་སྟོན་ལ་གཟིགས་ཞིབ་མཛད། དེ་ནས་བོད་ཁྱིམ་དགོན་པའི་ལམ་གཡས་སུ་མ་སུ་རི་བོད་ཁྱིམ་སློབ་ཟུར་རྣམས་དང་ལྷན་སྐུ་པར་བསྒྲོན་རྗེས་བོད་ཁྱིམ་ལྷ་མོའི་རུ་ཁག་ནས་ལྷ་གཞུང་མཁན་སློབ་ཆོས་གསུམ་འཁྲབ་སྟོན་གྱི་ལམ་ནས་གཟིགས་འབུལ་ཞུ་ཡོད་པ་བཅས།།